Hopp til hovedinnhold
Dåjma

Identitiehttahárjjidus

Dåjma birra

Ulme

  • Ietjas identitiehtav åtsådit ja ienep dádjadusáv oadtjot jut juohkkahattjan la moattebelak identitiehtta. Buorebut oahpásmuvvat ietjá oahppijda.

Dán barggobåttån bessi oahppe iesjguhtik bielijt åtsådit ietjasa identitiehtas, ja bessi ietjasa birra subtsastit ja ietjá oahppij birra oahppat. Hárjjidusáv máhttá aj tjadádit sihke mánájdasen ja gasskadásen. Nuoramus oahppijda gudi e buvte tjállet, lisj dávk vuogas aktan báhkobáŋkav dahkat árabut. Vuorrasamos oahppijda máhttá liehket sluogas várrodit jut dat majt sij juogadi ij sjatta beru almodiddjen.

Ájgge :
30 - 45 min
Juohkusa stuorrudahka :
10 - 35

Tjadádibme

  • 1

    Álgada ságastallamijn dan birra mij identitiehtta la.

    Gatjálvisá ságastallamij álggon: Majt merkaj gå mån lav mån ja dån la dån? Mij dahká jur mån lav mån? Lev gus mån sæmmilágásj juohkka dilen? Le gus juoga mujna mij agev sjaddá navti liehket, aj gå ållessjattugin sjattav?

  • 2

    Hábbmi de hárjjidusáv sidjij, ane ietjat vuodon

    Dievde post it-láhpajt majda nágin bágojt tjálá ma subtsasti guhtimusj dån la ja mij duv dahká dån, ja dabrrida dajt táblluj. Vállji muhtem bágojt majt la válljim, subtsasta manen la jur dajt válljim ja majt da dunji merkahi. Li gus nágin oahppe gudi iehtjasa dåbddi duv láhpájn?

  • 3

    Dálla máhtti oahppe sæmmi hárjjidusáv dahkat

    Oahppe oadtju guhtik post it-láhppahårev, ja dæhppodi láhpajt majna li bágo ma juojddá subtsasti gudi sij li, ietjasa oahppijbievdijda. Nuoramus oahppe máhtti tjállet ja tjuorggat.

  • 4

    Gåhtjo de oahppijt gålmmå láhpajt válljit

    Gåhtjo de oahppijt gålmmå láhpajt válljit ma sijá mielas li sierraláhkáj ájnnasa dasi gudi sij li/massta sij berusti, ja mij la sidjij årnigis iehtjádijda vuosedit.

  • 5

    Låhpan galggi oahppe klássalanján mannat iehtjádij ságajda

    Gåhtjo sijáv válldet fárruj dajt gålmmå láhpajt ja vádtset klássalanján ja buorástahttet guhtik guojmesa guovtes ja guovtes, ja subtsastit guhtik guojmmásisá láhpaj birra majt sij li válljim. Ane ájgev bagádalátjit galggá juohkkahattjav buorástahttet, ij dåssju sijáv gej siegen dábálattjat la.

Ájádusá låhpan

  • Lij gus gássjel hihttit majt galggi láhpajda tjállet? Manen/manen ij?
  • Manen válljiji dån válldet fárruj jur dajt gålmmå láhpajt gå galgajda iehtjádij ságajda mannat?
  • Lidjin gus muhtem láhpa majt ittjij sidá vuosedit iehtjádijda? Mij máhttá liehket sivvan gå ep sidá divna juogadit iehtjama birra juohkkahattjaj?
  • Gå iehtjádij ságajda manájda, buorástahtti gus avtak gejna dujna lij juoŋga aktisasj?
  • Gå iehtjádij ságajda manájda, buorástahtti gus avtak gen birra oahppi juojddá ådåsav? Alvaduvvi gus?
  • Ájádalá daj gålmå láhpaj birra majt válljiji: Mij luluj dáhpáduvvam jus dá gålmmå biele lidjin dujsta ierit váldeduvvam? Lidji gus dån ájn liehket dån? Mij luluj læhkám ietjálágásj?